ሹን

ከውክፔዲያ
የጥንታዊ ቻይና ንጉሥ የሹን ሐውልት

ሹን (ቻይንኛ፦ 舜) በቻይና አፈ ታሪክ የጥንታዊ ቻይና (ኋሥያ) ንጉሥ ነበር።

የቀርከሃ ዜና መዋዕል በተባለው ጽሑፍ ዘንድ፣ በንጉሥ ያው 70ኛው ዓመት ሹን አልጋ ወራሽ እንዲሆን ሰየመው። በሚከተለው ዓመት ሹን የያው ሁለት ሴት ልጆች አገባቸው። በያው 73ኛው ዓመት (ምናልባት 2061 ዓክልበ. ግድም) ዙፋኑን ለሹን ተወው። በ2059 ዓክልበ. አዲስ የሥራዎች ሚኒስትር የወንዞቹን ጎርፍ ገደበ። በ2058 ዓክልበ. ዩ የጻውወይ ሥራዊት አሸነፈ፤ ሹንም ሕግ ፍትኅ አወጣ። በ2052 ዓክልበ. «የምዕራብ ንጉሥ እናት» ተልእኮ በኋሥያ ግቢ ደረሰ። የዕንቁ ቀለበቶች እንደ ላከች ይዘገባል። በ2047 ዓክልበ. አገሩ በ፲፪ ክፍላገራት ተከፋፈለች። አሁን ዩ ወይም «ዳ ዩ» (ታላቁ ዩ) ከሹን ጋር እንደ ጋርዮሽ ንጉሥ ተቆጠረ። በ2036 ዓክልበ. የሺሺን ልዑል በተልዕኮ ወደ ግቢው ደረሰ። ያው በ2034 ዓክልበ. አረፈ። በ2028 ዓክልበ. ዩ በይፋ የሹን አልጋ ወራሽ ሆነ፤ አገሩም ከ፲፪ ወደ ፱ ክፍላገሮች አከፋፈል ተመለሰ። በ2026 ዓክልበ. ዩ የዮውምያው ብሄር አሸነፈ፣ የኋሥያ ተገዦች ሆኑ። በ2019 ዓክልበ. የሧንዱ ብሔር ተልእኮ እንቁ አመጡለት። በ2010 ዓክልበ. ሹን አረፈ። ተከታዩ ዳ ዩ የሥያ ሥርወ መንግሥት መስራች ይባላል።

በሌላ ምንጭ ሽጂሲማ ጭየን፣ ያው ያረፈበት ወቅት ሹን ዙፋኑን ለያው ልጅ ለዳንዡ አቀረበው፤ ሕዝቡ ግን ጉዳይ እንዲፈጽም የሄዱ ወደ ሹን እንጂ ወደ ዳንዡ ስላልነበረ፣ ሹን በንጉስነቱ ቀጠለ።

ከዚሁ ዘመን ሚኒስትሮች የሚከተሉት ስሞች «የሹን ቀኖና» በተባለው ታሪክ መጽሐፍ ተርፈዋል፦

  • ዩ («ዳ ዩ») - በአንዳንድ ምንጭ ዘንድ የጉን ልጅ ነው። መጀመርያ የሥራዎች ሚኒስትር ሆኖ የቻይና ታላቅ ጎርፍ በወንዞች ላይ ገድቦ በኋላ የሹን ጠቅላይ ሚኒስትርና ተከታይ ሆነ።
  • ጋው ያው - የሕግ ሚኒስትር
  • ችዊ - አዲሱ የሥራዎች ሚኒስትር
  • ሽዬ - የትምህርት ሚኒስትር
  • ጪ - የግብርና (እርሻዎች) ሚኒስትር
  • ቦ-ዪ - የእረኛ (መንጋዎች) ሚኒስትር
  • ህዊ - የሙዚቃ መሪ
  • ሎንግ - የመገናኛ ሚኒስትር

የውጭ መያያዣ[ለማስተካከል | ኮድ አርም]

ቀዳሚው
ያው
ኋሥያ ንጉሥ
2061-2010 ዓክልበ. ግድም
ተከታይ
ዳ ዩ